Gemeentebrief
Julie 2026 (week 3)  

“Dit verseker Ek julle. Ek het nog by niemand in Israel so ’n groot geloof teëgekom nie…
Gaan terug, wat jy geglo het, sal gebeur.”
Matteus 8:5-13
 

In  Matteus is daar ‘n verhaal van ’n Romeinse offisier wat na Jesus toe kom met die versoek om sy “pais” gesond te maak. Die Griekse woord “pais” beteken kind, slaaf of dienskneg.  Daar is dus ’n goeie kans dat die offisier na Jesus toe kom oor sy kind wat siek is, ernstig siek is. Die gewone woord vir slaaf “doulos” word nie hier gebruik nie.  En net die feit dat hy as heiden / ’n Romeinse offisier (die vyand van die volk) na Jesus toe kom, wys hoe desperaat hy is. Stop net eers hier.
As jy kinders het, sal jy dit herken. Die desperaatheid, moedeloosheid, magteloosheid, die emosie en bekommernis oor jou kinders. Lees dit hier raak. Hier staan eerste ’n pa met sy hart in sy hand voor Jesus:  Here, help my kind!  Ek is op gesoek na hulp en antwoorde, asseblief Here, help. Ons kan nie meer nie. My kind is in die moeilikheid.
En Jesus sien meer, hy sien hierdie pa se hart, hy sien sy desperate vasgryp en vertroue in dit wat Jesus kan doen.  Want dit waarmee ek Jesus vertrou, dit waarmee ek na Hom toe gaan, die onmoontlik in my lewe wat ek oorgee vir Hom, die eerlike eg voor Hom gaan staan, wys hoeveel ek Hom vertrou, wys hoeveel ek glo.
En Jesus sien dit:  “Dit verseker Ek julle. Ek het nog by niemand in Israel so ’n groot geloof teëgekom nie… Gaan terug, wat jy geglo het, sal gebeur.”
Wat as my geloof gesien en gemeet kan word in dit waarmee ek na Jesus toe kom?  Want geloof is meer as die kennis in my kop, as dit wat ek weet. Geloof is hoe ek vanoggend met ’n oop hart voor Jesus staan.