Gemeentebrief
NOVEMBER 2025 (week 4)
“God het ons vrygespreek deurdat ons glo. Daarom is daar nou vrede tussen ons en God
deur ons Here Jesus Christus.
Deur Hom het ons in die geloof ook die vrye toegang verkry tot hierdie genade waarin ons nou vasstaan.
En ons verheug ons ook in die hoop om deel te hê aan die heerlikheid van God.
Dit is egter nie al nie. Ons verheug ons ook in die swaarkry,
want ons weet, swaarkry kweek volharding
en volharding kweek egtheid van geloof
en egtheid van geloof kweek hoop
en die hoop beskaam nie, want God het sy liefde in ons harte uitgestort...”
Romeine 5:1-5
The powerful truth is that God is a god of hope, even as we live in a world in which hope can seem to die.
Loren B Mead
Bybelse hoop is die toekoms wat God belowe het, of die toekoms soos God dit sien, dit ken en op hierdie oomblik in ons mee besig is. Dit is nie wishful thinking nie… of blinde optimisme nie… of onrealisties vaag nie. (Soms gee die woordjie “hoop” in Afrikaans juis ons onsekerheid weer: Ek hoop maar dinge werk uit…)
As die Bybel oor hoop praat dan is dit iets wat vas en seker is – lees weer die teks hierbo. Hoop staan en val by God se karakter en op sy beloftes. Dit is hoekom dit anders en baie meer is as wat ons dink. Hoop is ons vorentoe kyk en weet God is klaar voor in die pad, maak nie saak wat nou besig is om te gebeur en wat in ons lewens aan die gang is of wat mense aan ons doen nie. Hoop maak dat ons in swaarkry bly vashou aan wat ons glo oor wie en hoe God is. Hoop beteken ons gee nie op nie – nie op God en sy beloftes of op mense of op kerk nie. Hoop is die weer opstaan en opkyk, want dit wat God in ons binne-kante mee besig is, is baie meer werd en baie groter as enige iets op ons pad.
En dit is hoekom Kersfees so great is! Want elke liggie en versiering en geskenk vertel van Jesus wat kom. En Jesus is die beste bewys van hierdie hoop, van God wat sy liefde in ons harte kom uitstort, van God wat besig is om te werk.
Hoop sien ek op hierdie stadium die beste in hoe julle vir ons omgee en ons support en gee en vir ons bid in hierdie moeilike tyd en in hoe julle saam met ons glo in kerk, hier, en in hoe julle saamstap. Julle maak dat ek sal bly hoop want ek sien daarin God se môre.
Dankie daarvoor.
# Ons Kerssangdiens is Sondag 14 Desember: Who are you following this Christmas?
Ek weet party mense is al vir Kersfees Suid-Afrika toe maar ons gaan hierdie jaar ons deure oopgooi vir 'n spesiale Kerssangdiens / Carol service. Nooi al jou vriende en kom sing saam, kom kuier en vier Jesus se koms. Soos ons gebruik is, gaan ons saam eet na die tyd - al die inligting en inskrywings is hier. Maar kom help ons om hierdie dag spesiaal te maak!
# Bid saam:
BID ASSEBLIEF vir hierdie nuwe energie wat loskom in ons kerk - dat die Here dit sal gebruik vir sy koninkryk, om ons die kerk te maak wat Hom dien!
# en dan 'n advertensie: Breytenbachs adverteer 'n administratiewe pos - kyk daarna of stuur dit vir iemand wat werk soek - advertensie is aangeheg.
Hoop jy het 'n great week!!
Groete in Christus!
Rian
