Gemeentebrief
AUGUSTUS 2026 (week 2)  

“Die Here het jou nie liefgekry en gekies omdat jy groter was as die ander volke nie, jy was die kleinste van almal..."
Deuteronomium 7:7

As kind was ons naaste strandoord Jeffreysbaai. Ons het daar leer swem en branders ry. Toe ons nog baie jonk was, kan ek onthou hoe ons Vrydagmiddae na skool gaan swem en roomys eet het op die strand voor die Wimpy. Ons het nie op die strand gelê en “tan” nie – dit was vir die Valies en die girls. Ons het branders gery, die een na die ander, hoe dieper hoe beter, tot ons so uitasem was dat ons net in die vlak water gedryf het, om weer asem te vang.
En die heeltyd het die lewens-redders in hul rooi speedo’s op die torings gesit en wag gehou, vir in geval een van die Valies, wat nie die see en strome en branders verstaan het nie te veel monde vol seewater ingekry het, en dan het hulle ingespring en kom help.
Die lewensredders kon help, want hulle kon nog beter as ons swem. 
Ek kon nie anders as om hieraan te dink, toe ek die volgende lees nie:  We can only transform people to the degree that we have been transformed. We can only lead others as far as we have gone. We have no ability to affirm or to communicate to another person that they are good or special until we know it strongly ourselves. Only beloved people can pass on belovedness. 
Jy kan niemand red as jy nie goed kan swem nie. Anders is daar ’n groot kans dat julle albei kan verdrink.
Ons sukkel om onvoorwaardelik te vergewe en lief te wees, omdat ons nie glo ons word onvoorwaardelik liefgehê nie.  Dit is waar geloof begin en dit is waarop geloof staan en dit is waarop ons moet bou. Daar is nie ’n ander pad of manier nie.
Deuteronomium7:7-9
“Die Here het jou nie liefgekry en gekies omdat jy groter was as die ander volke nie, jy was die kleinste van almal. Omdat die Here jou liefhet en Hy sy belofte nagekom, wat Hy met ’n eed bekragtig het aan jou voorvaders, het Hy jou deur sy groot krag laat wegtrek en jou bevry uit die plek van slawerny uit die mag van farao, die koning van Egipte.
Weet dan nou:  die Here jou God, is God. Hy is die betroubare God wat sy verbond in stand hou en sy troue liefde betoon tot aan die duisendste gelag van hulle wat Hom liefhet en sy gebooie gehoorsaam…”.