Gemeentebrief
APRIL 2026 (week 2)  

“Daardie Sondagaand was die dissipels bymekaar. Alhoewel die deure gesluit was
omdat hulle bang was vir die Jode, het Jesus gekom en tussen hulle gaan staan...”
Johannes 20:19
“The danger for any follower of Christ is not that we do not believe, but that what we believe does not
make any difference, for the church and for the world.”
Stanley Hauerwas

Iets het geskuif. Iets het geskuif oor wat ons dink ons met Jesus kan maak. Dalk is dit omdat ons gewoond of gemaklik geword het met Christenskap, met kerk, met die verhale van Jesus, of dalk omdat dit ’n handige add-on geword het. Maar as ek die storie lees van dissipels wat bang agter toe deure wegkruip na Jesus se dood, moet dit vir ons iets anders wys. Om Jesus te volg, was vir hulle ’n saak van lewe of dood – hulle lewens was op die spel. En dit is die skokkende werklikheid van die kruisiging van Jesus – Jesus is dood gemaak. Hy is doodgemaak omdat wie Hy was en wat Hy geleer het, nie inpas of gemaklik was vir die kerkmense en leiers van sy tyd nie. Hy is doodgemaak want sy koninkryk vra baie meer as wat ons gemaklik is om te gee en te word. Ons kan nie met Jesus doen en Hom volg soos dit vir ons werk en inpas by ons lewens nie. 
Hoekom skryf ek vanoggend dit?  Ons het vir die kinders geleer dat ons net een ding doen:  “We follow Jesus!” Ons moet dit doen – maar ons moet weet, dit gaan baie meer vra as wat ons dink en dit is groter en meer as om net te sê dat ek glo.
As Jesus opstaan, dan breek Hy letterlik alles wat doodmaak en lewe terughou – en dit is die uitnodiging:  Volg Jesus – nie volg reëls en godsdiens voorskrifte nie, moenie mense volg nie – maar volg die Here wat lewe en lewe gee en lewend maak.  En stop net vir een oomblik by die gedagte: dat Jesus alles gaan verander. Volg hierdie Jesus.